بديت هذا المشروع وعمري 18 سنة وكنت ادرس بالسنة الاولى جامعة
المشروع كان شراكه بيني وبين وحده من صاحباتي
تكلفه المشروع 100 الف
المحل كان بدور نسائي فوق سوق تجاري
ايجار المحل 45 الف
المحل كان عباره عن قسم تجميل وقسم خياطة
مده المشروع سنه كامله
الايجابيات
– وجود المحل بسوق كفل لي عميلات كثير وشغل لي ركن الخياطه بطريقة ممتازة بحيث اني كنت اتفق مع محلات الاقمشة يرسل لي عميلات اللي يشترون اقمشة وانا ارسل له اللي يحتاجون لاقمشة (مصلحه متبادلة)
كان الدخل الشهري لهذا القسم يتراوح بين 20-25 الف في اوقات الاجازات وبدايه موسم المدارس
–
اسباب فشل المشروع
– توظيف سعوديات كخياطات وكوفيرات.. الصراحه انا كنت مع السعوده لكن للاسف هالشي ضرني كثير لان كل اللي وظفتهم كانوا 7 كثير اهملوا بالشغل خاصه بموضوع الوقت وكثيره اعذارهم ومناسباتهم وغيابهم وصعوبة عملهم مساء ((اكتب تجربتي فقط لكن انا متاكده اني ماوفقت باحد كويس ولا اكيد فيه سعوديات فيهم الخير والبركة)) هذا الشي ضر المحل واخر بتسليم طلبيات بعض العميلات,, وتاخير في تقديم خدمات التجميل
– الشراكه مو خسرت المشروع الا خسرت صاحبتي كمان وبعدها حرمت ان الصداقات يدخل فيها فلوس..وعلى العموم الناس تختلف
– كانت الاداره ثنائية فكنا كلنا ندير المحل وكل شخص يحط رايه ولا يشاور الثاني.. المفروض كنا نتفق قبل نصدر قرارات للموظفات
– ما كان عندي دخل ولا حطيت جزء من راس المال حتى يساعدني في الاوقات اللي كان ما يدخل فيها المشغل ((طبعا هذا راجع لصغر سني ولقله معرفتي في التجارة))
– كنت اعطي الموظفات رواتب ثابته وهذي غلطه المفروض راتب اساسي وعمولات .. لانه فيه ايام واشهر يقل فيها الدخل وانا ملزمة ادفع راتب كامل رغم انه ما فيه شغل وهذا سبب خساير كبيره للمشغل
– وجود المحل في سوق ماكنت قادره اشتغل ع برامج العرايس والمكياج للسهرات وهذي دخلها كبير اكيد فكان بس ركن التجميل قايم على تشقير الحواجب وقص شعر الاطفال
– ما كنت قادره استقدم عماله لانه ما فيه سكن لهم داخل السوق وكان فيه صعوبه اني افكر أستاجر لهم في مكان ثاني هذا بيدخلني في متاهات مراقبه الخادمات وتوفير نقل لهم ياخذهم ويرجعهم للمشغل
– جهزت المشروع بتكاليف كبيره من مكائن الجوكي افصل الانواع حتى كنت جايبه ماكينه جوكي تطريز جنز يعني جهزت اشياء كنت قادره استغني عنها في البداية وهذا كلفني من راس مال المشروع المفروض تركته ع جنب افضل لي .. وخليت المشروع يصرف ع نفسه يعني يكبر مع الوقت
– صغر سني ما كنت قادره ادير عماله (( كانوا يلعبون على ))
– ما كان عندي خلفيه لا دراسية ولا هوايه في مجال التصميم او الخياط هاو حتى الكوافير حتى اقدر اخذ واعطي مع العاملات ع الاقل واتابع شغلهم .
التحديات
– لما بدا المشروع يخسر في الاوقات اللي ما فيها موسم خياطه فكرت اني اضيف نشاط استوديو نسائي للتصوير ما رخصت له ولا شي كنت بس ابي دخل شوي حتى توفي معاي الشغله جبت معدات اله تصوير احترافيه وخلفيات واخذت دوره احترافيه بالفوتشوب حتى اعدل ع الصور وجهاز كمبيوتر كلفتني تقريبا 10 الالاف .. ما كان الموضوع يجيب همه حتى , لانه اقتصر ع تصوير الصغار .
– كمان حتى انقذ المشروع اضفت قسم تاجير فساتين الافراح وبدل العرايس كان فيه دخل حلو بس في وقت المناسبات بعد مو شي دائم .
كيف انتهى المشروع
بعد ما زادت الخساير وكثرت الديون على لاني كنت اتسلف على شان الرواتب ولا قدرت احرك المشروع اكثر من كذا قررت اني ابيعة لان التكاليف اكثر من الدخل..
خلاصه تجربتي
المشروع جدا مربح خاصة للي عندها وقت في المساء وتقدر تدير عماله لانهم فيهم حقهم ومتعبين
ما افكر اعيد التجربه لكثره المشاغل اولا وغير كذا ما لقيت نفسي لا بتصميم ولا خياطه ولا تجميل والمشاريع تبغى انتي تقومين فيها مو بس اداره من ناحية الخبره حتى يكون لك لمسه في المشروع وبنفس الوقت تقدرين تضبطين عمالتك لانك فاهمه بالشغله ومحد يلعب عليك مثلي .
المصدر :
http://www.vb.eqla3.com/showthread.php?t=888801